Lucus Asturum

Lucus Asturum ye l’orixe históricu de Les Asturies actuales. Menciónala Toloméu nel sieglu II como ciudá d’Asturia (Lukos Asturón) y apaez na Cosmografía del Anónimu de Rávena del sieglu VI.

Reséñase na donación d’Alfonsu III nel 905 y na d’Hordoñu II nel 921 (civitatem Lugo destructam). La ilesia de Lucus Asturum tenía «decaníes» que n’Asturia significaba otros territorios dependientes na fastera Eo-Mena. L’espaciu de Lucus Asturum tenía una muria que diba dende Brañes pel ríu Nora hasta Muries de Paraxuga (Altu de Buenavista) onde había una torre y puerta d’entrada y onde taba’l vieyu camín de Les Regueres. Lucus Asturum yera  una cívitas, un espaciu ampliu delimitáu por emparamientos defensivos, un conceyu rexíu por unes normes onde los habitantes yeren ciudadanos. Les llendes de la ciudá, el términu municipal,  yeren mui importantes yá que nelles s’apliquen unes normes específiques.
La llende norte de Lucus Asturum yera’l ríu Nora, nome deriváu del verbu honrar o d’antropónimos «Honorius, Norenius…», asociaos al significáu d’espaciu o terrén: «Honor de Grandas», «Honor de Suarón»… Esta zona yá taba mui poblada dende siempre anque tenga nomes romanos: Abuli, Cerdeño, Villamiana, Fitoria, Lloriana, Tiñana, Brañes, Mendones, Cadellada (Caedes Lata)…
Yera una importante zona de pasu o cruce y un focu romanizador igual qu’otros como Gegione, Favionavia, Vadinia, Blendium o Portus Victoria pero la preeminencia de Lucus Asturum afítase nel so prestixu como centru relixosu, como llugar de centralidá y puntu d’alcuentru. Cerca de Gegione hai referencies a Xove o Monte Xoveyanus pero ye en Lucus Asturum onde esistía un templu mui principal a Xove nel colláu xovetus continuación d’otru santuariu asturianu al dios supremu Llug. Mui frecuentes n’Asturia yeren los templos a Diana (Santa María, 15 agostu) mui parecida a la diosa céltica de la lluna. El dios Xanu, el dios de xineru, protector de los ganaos, tuvo abondu cultu nesti territoriu.

Lucus Asturum yera nel sieglu V l’espaciu urbanu más importante de tola fastera tresmontana.

Los bailles y cánticos a les vírxenes y santos són una tradición anterior a la romanización como la Danza Prima qu’hasta hai pocu solía facese cola lluna llena. Portus Victoria (Santoña) foi otru centru romanizador yá que los autrigones taben romanizaos dende cuantayá y fueron aliaos de Roma na llucha contra los asturcántabros. Nun ye descartable que la conquista del territoriu tresmontanu arribara pel mar dende Aquitania en naves militares a esti puertu de Santoña. La importancia de Lucus Asturum nos sieglos IV-V foi decisiva nel entamu de la cristianización del territoriu tresmontanu gracies a la llegada de los vándalos arrianos.
El cristianismu yera yá la relixón oficial del Imperiu romanu dende l’añu 313 pero esti nuevu sincretismu tardó n’implantase. La consolidación del cristianismu foi rápida nes ciudaes, onde había yá una fonda romanización (Bráccara, Astúrica, Clunia, Lucus Asturum, Portus Victoria…) pero foi más lenta n’aquellos valles y territorios alloñaos.
Cuando desapaez l’Imperiu romanu ye la ilesia la qu’hereda la organización política del imperiu (provincia, conventu y diócesis). L’obispáu d’Astorga data del sieglu III, algamaba tola meseta asturicense hasta’l Dueru pero dependía del de Braga y nunca se menciona nél a Lucus Asturum. Lucus Asturum nun foi oficialmente capital pero sí centru articulador de fechu, como cruce de caminos y centru relixosu antes y durante la dominación romana. El términu sagráu «lucus» asina lo amuesa. Llugu allugaba importantes templos al dios supremu, a Xúpiter, al dios capitolinu, como gran centru relixosu y polo tanto centru de pelegrinaxe, de servicios públicos, un centru comercial, que tenía por ámbitu d’influencia tola fastera tresmontana de peñes al mar. Si l’obispáu monásticu a la manera nórdica s’establez en Lucus Asturum ye porque esti espaciu yera’l de mayor prestixu. Tamién pudiera ser qu’esti llugar fuera un centru de santidá cristiana, de reliquies o de martiriu. Lucus Asturum yera nel sieglu V l’espaciu urbanu más importante de tola fastera tresmontana, el sitiu más afayadizu p’allugar un monasteriu-obispal principal, un palaciu d’un príncipe de la Ilesia y p’asentar la so potestá.
Astúrica Augusta o Clunia nun fueron más que poderes ayenos impuestos a esos «montañeses» del norte. Lucus Asturum foi otru centru romanizador, y cola llegada de los vándalos el primer centru cristianizador de la tresmontania, el más importante al norte de los montes, el primer obispáu de les Asturies, l’obispáu vándalo-arrianu de Lucus Asturum del ríu Eo al valle del ríu Mena. El territoriu asturiense que da razón de ser y orixe principal a les actuales Asturies d’Uviéu y Santiyana.