La villa de Santiyana tien el so orixe nel Reinu d’Asturies, cola repoblación d’Alfonsu III el Grande, que fundó’l monasteriu de Santa Iyana nel 870 nun llugar nomáu Planes. A la xoven Iyana martirizáronla n’Asia Menor durante les persecuciones de Dioclecianu nel sieglu III. Unos frades pelegrinos del sieglu IX llevaren les reliquies de Santa Iyana pa esti llugar, llevantando una ermita, nuna política palatina de traer restos venerables p’Asturies pa da-y mayor importancia política al reinu.
Construyóse una ermita onde venerala y un cenobiu. Nel añu 980 el monasteriu taba consolidáu. Conocíase como Asturies a tol territoriu ente la montaña y la mar que diba dende los ríos Eo al Miera, onde entamaben les Asturies de Tresmiera, territorios orixinarios del reinu. El territoriu monacal de Santiyana qu’hasta entós se conocía simplemente como Asturies pasó a dir nomándose como Asturies de Sancta Iuliana anque tol territoriu pertenecía al Obispáu d’Uviéu dende los sos oríxenes. Fernando I dio l’impulsu definitivu al monasteriu con privilexos, como poner baxo soberanía del abade la villa y posesiones y fue estableciéndose’l dominiu na rexón perconocida yá como Asturias de Santiyana. El templu pre-románicu sustituyóse pol que, con diversos añadíos, se conserva hasta hoi, del sieglu XII. Consiguió convertise nuna de les abadíes más importantes del norte, la de mayor territoriu. El Cartulariu contién copies de 94 escritures del 870 al 1202. La propiedá de tola tierra de los nueve valles dende’l Deva al Miera yera d’esti monasteriu hasta’l sieglu XII cuando entama un fortalecimientu la nobleza col apoyu real formándose grandes señoríos como los de la Vega, llueu marqueses de Santiyana, los de Buelna y Castañeda que van suplantar los derechos del monasteriu. Ello va obligar a una xuntura de los nueve valles asturianos contra los abusos de la nobleza que lleven al famosu Pleitu de los Nueve Valles que terminó cola rehabilitación d’éstos a la condición de tierres de realengu. Estos nueve valles van formase como merindá d’Asturies de Santiyana.
Nel 1184 produzse la dixebra eclesiástica de Les dos Asturies. Una sentencia toledana arrebata a la diócesis d’Uviéu estes tierres asturianes a favor de Burgos y van dir ametiéndose alministrativamente al reinu castiellanu ya que Castiella necesitaba una surtida marítima que-y diera más ingresos. Llugares como Santa María del Yermu siguieron perteneciendo al Obispáu d’Uviéu. Alfonsu VIII concedió-y fueru a Santiyana y pasó a ser capital de tol territoriu d’Asturias de Santiyana. El monasteriu decayó ante la presión de les cases señoriales apoyaes por una monarquía débil, pero comenzó’l desarrollu de la villa, cola Plaza del Mercáu y la Torre del Merinu d’Asturies, del sieglu XIV, sé del goviernu. En 1377 el valle de Toranzu quéxase al rei de los abusos de la casa Castañeda y los nueve valles asturianos solidarícense entamando un llargu procesu col fin de recuperar la so antigua condición de realengu dende los años del Reinu d’Asturies. Xuan II dio-y el señoríu de la villa al primer Marqués de Santiyana, Duques del Infantáu.
Toles Asturies referíense siempre como una dualidá: la d’Uviéu y la de Santiyana. Na dixebra territorial de 1835 parte de la primera pasó a formar la provincia d’Uviéu y l’Asturia de Santiyana quedó na so mayor parte na de Sanander yá que Ribedeba y les Peñamelleres prefirieron pasase pa la provincia ovetense.
El Pleitu acaba en 1581 cola vinculación nobiliaria y los nueve valles asturianos faen xunta xeneral dende 1630 en Bárcena de la Puente. Cuando Sanander algama obispáu independiente del de Burgos en 1754 torna pal so primixeniu ámbitu: l’Arzobispáu d’Uviéu. En 1778 Asturies de Santiyana sepártase de Burgos pero durará poco debío a la oposición burgalesa. Santiyana tuvo partíu xudicial propiu hasta 1840. Contién abondos palacios barrocos como les casones de Cossío o Quevedo y la casa de los Quirós: nel so escudu había una lleenda qu’afirmaba: “Depués de Dios, la casa de Quirós”. La fiesta de la patrona celébrase’l 28 de xunu. El País Asturianu divídese en dos territorios l’Asturia d’Uviéu y l’Asturia de Santiyana. Otros nomes como las Asturias de Sancto Anderio, les de Tresmiera o de Castiellu surdieron, pero toles Asturies referíense siempre como una dualidá: la d’Uviéu y la de Santiyana. Na dixebra territorial de 1835 parte de la primera pasó a formar la provincia d’Uviéu y l’Asturia de Santiyana quedó na de Sanander y Ribedeba y les Peñamelleres prefirieron pasase pa la ovetense. Nel sieglu XIX llamóse Santiyana del Mar a la villa pa estremala d’otres pero nun perdió la so preeminencia como vieya capital d’esti territoriu históricu asturianu. §