El documentu ufre cerca de 50 midíes necesaries pa la normalización del idioma y que pueden facese posibles al traviés de la negociación presupuestaria.
La ONG Iniciativa pol Asturianu preparó un informe con propuestes pa la realización d’acciones y la modificación y creación de partíes dedicaes a la normalización llingüística nel Presupuestu d’Asturies del 2020.
Esta selmana entregóse’l documentu a los partíos col envís d’aportar idees y reivindicar una mayor esmolición por midíes avanzaes de normalización nun contestu nel que los partíos que sofiten la oficialidá son mayoría nel parllamentu asturianu.
Inaciu Galán, vocal de Rellaciones Institucionales, púnxonse en contacto colos voceros y voceres de les formaciones parllamentaries y vio una bona acoyida. “Plantegamos propuestes de distintu tipu, afondando na necesidá de que les midíes seyan tresversales a tol Gobiernu, con idees d’acciones pa toles conseyeríes y principales entes de l’alministración autonómica”, apuntó’l vocal d’Iniciativa.
Ente les propuestes apecen delles dedicaes a estayes clave como’l sistema educativu, la RTPA o l’ámbitu empresarial, ente otros. Galán recordó que “nun contestu de mayoría pola oficialidá y mientres siguimos trabayando en construyir un consensu suficiente, ye clave avanzar en toles posibilidaes que da’l marcu actual de la Llei d’Usu del asturianu de 1998, hai qu’aprovechar toles oportunidaes que tien”.
“Ye clave avanzar en toles posibilidaes que da’l marcu actual de la Llei d’Usu del asturianu de 1998, hai qu’aprovechar toles oportunidaes que tien”
Inaciu Galán comentó que “facemos entrega d’un documentu que presenta llínies d’actuación nes conseyeríes del Gobiernu d’Asturies pa consiguir una presencia del idioma en tol llabor de l’acción de gobiernu. Les propuestes que recueye esti informe nun requieren un gran gastu económicu y gracies a elles l’idioma ganaría mucha normalidá na sociedá asturiana”.
Nesi sentíu, el vocal de la organización dixo que “esti informe tien propuestes pa la Conseyería de Sanidá y tamién pa Fomentu pues consideramos que l’asturianu nun puede depender únicamente de Cultura. Tien que ser un trabayu tresversal en tola acción de gobiernu”.
P’acabar, Inaciu Galán comentó tamién que “tamos nun momentu nel qu’una mayoría parllamentaria puede echar un gabitu pa siguir trabayando na normalización del idioma y consiguir normalizar tamién la presencia del asturianu nos presupuestos, n’axenda política y na propia acción de gobiernu”.