5.4 C
Oviedo
viernes 29, marzo 2024

Sobre’l significáu de ‘coyer la flor’

Lo más leído

¡Haz clic para puntuar esta entrada!
(Votos: 0 Promedio: 0)

Ún de los signos d’identidá d’un pueblu ye nun cabe duldes el so himnu colectivu o nacional. Los himnos nacionales representen los sentimientos de pertenencia, los ideales, les esencies y tolos elementos colectivos y compartíos d’esa mesma comunidá a la que representa.

Por eso más que signos concretos són símbolos puesto que signifiquen una idea abstracta de xuntanza y vinculación a tou un país. Nel cancioneru tradicional asturianu mui poques són les que se refieren al alma colectiva de Les Asturies. Ente elles destaquen dos: una ye la que reza «Santa María nel cielu hai una estrella qu’a los asturianos guía» que suena nel carillón de La Escandalera d’Uviéu y otra ye «Quixera cantar a Asturies col aire les sos fiestes y poner en cada nota un recuerdu de mio aldea» ésta con un estribillu onde se pregunta ónde poner los claveles pa que naide los vea. La estructura y estilu d’esta última ye mui asemeyada al «Asturies Patria Querida» y sobremanera na referencia a los «claveles». Del himnu oficial d’Asturies sabíase del so orixe más bien poco y camentábase que yera una más de tantes canciones populares del folclor asturianu, anónimes y cuasi ancestral. Pero huei sabemos que nun ye asina. La composición ye d’una tradición relativamente reciente, una rítmica habanera venida d’ultramar y popularizada n’Asturies por Juanín de Mieres en forma tonada con una breve y misteriosa lletra ablucante pa más d’un analista d’himnos patrios polo prosaico y vulgar de la so copla en contraste col rotundu y patrióticu estribillu col qu’entama. Probablemente lletra y música tengan oríxenes diferentes. Los detractores d’esta lletra orixinal del himnu asturianu yeren partidarios de suprimila y camudala por otra nueva pues nun veíen axeitáu nin propiu d’un himnu seriu eses referencies «desafortunaes» al fechu simple de subir a un árbol o coyer una flor… En realidá poques veces nos paramos sele a reflexonar sobre eses palabres y términos poéticos intentando ver nellos erróneamente descripciones literales d’acciones humanes y propósitos concretos.

Coyer la flor simboliza algamar la meta de la glorificación patriótica d’Asturies y de la so esencia como patria de los asturianos.

Pero nunca nos decatamos a pensar el sentíu non literal sinón lliterariu del testu y nes connotaciones abstractes que’l mesmu testu poéticu conlleva. El términu «coyer la flor» na cultura asturiana ye tamién una espresión mítica que significa algamar un ideal, una meta, quimera idílica, algamar una esencia, una razón de ser, un suañu, una bona suerte que se-y desea a la patria, esto ye, tolo meyor. El sintagma tien relación con atopar un trébole de cuatro fueyes que significa atopar bona suerte, allegría… El sentíu abstractu del términu ye ési. Coyer la flor simboliza algamar la meta de la glorificación patriótica d’Asturies y de la so esencia como patria de los asturianos. Nun sentíu paecíu «coyer el trébole» en realidá ye coyer el trébole de cuatro fueyes, coyer la flor, porque trés fueyes nun faen flor pero cuatro sí, la flor del tetrasquel, que na cultura asturiana significa trunfu, santidá y gloria.
Vilareyo. Sobre'l significáu de coyer la florAsinamesmu nel folclor asturianu «clavel» significa tesoru, bayura, cosa caro y apreciao. Les alusiones al árbol nun puen ser otres nel imaxinariu totémicu asturianu que les d’un carbayu, con toles connotaciones mitolóxiques que tien l’árbol sagráu de l’antigua cultura asturiana que simboliza la permanencia y vitalidá de los raigaños fondamente ya íntimamente mecíos cola tierra madre, esto ye, són la representación de la patria mesma na so esencia natural. Notru sentíu, el fechu de subir y coyer una flor, regalu, troféu o premiu, ta tamién mui presente nel imaxinariu míticu asturianu como la propia simbolización de la fazaña, la empresa trunfal o la xesta almirable, asociáu tamién al conceptu de valor, fuerza o brenga, valentía, enfotu y vitalidá. «Subir y coyer» tien unes connotaciones mui positives y honorables que nun tien pol contrariu «baxar y coyer». Nel arte de la simbolística popular prácticamente tou són metáfores: subir ye ganar o trunfar y coyer la flor significa pañar les esencies nacionales asturianes (la flor y ñata d’Asturies) y glorificales poniéndoles nun sitiu relevante a la vista de toos, esto ye, nel balcón principal de la casa. Nes casones y palacios asturianos el balcón nun ye un sitiu cualuquiera, ye’l llugar principal de la fachada. Esi onde s’espón con arguyu el blasón familiar, los trunfos, banderes, deseyos, l’alma y los símbolos. Esa flor o troféu que significa tamién l’amor a la pareya, a la familia, a la casa y a la patria.

¡Haz clic para puntuar esta entrada!
(Votos: 0 Promedio: 0)

Más del autor /a

DEJA UNA RESPUESTA

Por favor ingrese su comentario!
Por favor ingrese su nombre aquí

- Publicidad -

Últimos artículos