Juan Miguel de la Guardia y Ceínos (Hontaneda 1859 – Uviéu 1910) foi el padre del urbanismu ovetense de finales del XIX y dexó amuesa de la so elegante arquitectura clasicista.
Miguel de la Guardia algamó por unanimidá el concursu convocáu pa la plaza d’arquitectu municipal d’Uviéu en 1882, durante’l mandatu del alcalde José Longoria Carbajal. Xunto a Javier Aguirre y a Nicolás García Rivero, pertenecen a la xeneración artística de 1881, caracterizada por un elegante clasicismu eclécticu que dio toa una seña d’identidá non sólo al capital sinón a tol país asturianu. Exerció esta profesión na ciudá d’Uviéu durante tola so carrera, per trenta años, espardiendo’l so llabor creativu a otres localidaes asturianes.
El so primer proyectu pa Uviéu foi el del mercáu cubiertu d’El Progresu na cai Pelayu. Esti mercáu, conocíu como La Placina, inauguróse en 1887. En 1888 diseña’l templu de la música del Paséu del Bombé y en 1889 la casa númberu 12 de la cai del Rosal. En 1896 entama facese la elegante ilesia de Les Saleses y al empar trabayó na reconstrucción de la del Cristu les Cadenes, n’estilu neogóticu, terminando les obres nel 1900, ilesia que se destruyó na Guerra Civil. En 1905 diseña’l Teatru Celso de la cai Xovellanos, un local pioneru na exhibición cinematográfica n’Uviéu, clasicista pero con elementos modernistes, qu’amás disponía d’un restorán. Otros proyectos nun llegaron a realizase, como’l Teatru-Circu de 1902 y una pasarela penriba del acueductu de los Pilares. Asturies ye un gran muséu de l’arquitectura del xenial Miguel de la Guardia, a pesar de la destrucción cometida pola piqueta especulativa.
Miguel de la Guardia tamién trabayó realizando encargos pa particulares. La ciudá d’Uviéu vivía naquellos años, como toa Asturies, nuna etapa de bayura económica debío a los capitales de Cuba. N’Uviéu había propietarios con mui buen gustu artísticu que queríen edificios non sólo confortables sinón tamién elegantes. Ello contribuyó al orniamientu de la ciudá contruyendo fachades, palacios y edificios guapos y vistosos. Asina ficiéronse les cases del Pasaxe y adyacentes formando la primer manzana de la cai Uría en 1894 con un elegante arcu trunfal con entrada a la galería interior onde s’alcontraba l’elegante café del Pasaje. Otros edificios suyos són: la Casa de Polo, derribada nos años 1980, la Casa del marqués de Casa-Tremañes, del añu 1895 refecha nos años 1980, la casa númberu 12 de la cai Fruela (1889), la primer casa de la cai del Rosal con Fruela (1899). Diseñó en 1901 el suntuosu palaciu del Deán Payarinos na Corrada del Opispu y otru suntuosu palaciu na cai Torenu, construyíu pa don Anselmo González del Valle, con marquesines de fierru y cristal y un gran hibernaderu, too ello encerráu nuna maxestuosa verxa, ún de los más suntuosos palacios ovetenses que se derribó nel añu 1978. Tamién realizó edificios nes cais Gil de Jaz (1901) y Torenu, (1902), esbarrumbaos na segunda metá del sieglu XX consecuencia de la especulación inmobiliaria.
El palaciu Villa Madalena diseñólu en 1902 pa Victoriano Campomanes, comerciante d’Uría, nes afueres de la ciudá nel Paséu de la Siella del Rei. 
En 1909 terminóse’l palaciu del marqués d’Aledo, na plaza San Miguel, palaciu tristemente esbarrumbáu nos años 1980.
Fuera d’Uviéu realizó diseños singulares como’l mercáu de fierru de Villaviciosa y el de Mieres, construyíu ente 1904 y 1906. La Villa Tarsila de Lluarca (1894), que-y sirvió de modelu pal palaciu d’Aledo n’Uviéu. La Casa Muñiz, na cai La Cámara d’Avilés ya otra obra suya como les artístiques Villa Carmen, en Villar y el maxestuosu El Capitoliu, de Grao. Ye diseñu suyu el Casinu de Castropol (1911).
Asturies ye asina, un gran muséu de l’arquitectura del xenial Miguel de la Guardia, a pesar de la destrucción cometida pola piqueta especulativa.
Centenariu del arquitectu asturianu Miguel de la Guardia
