Toponimia asturiana de La Pernía

La Pernía ye una comarca histórica nes cuenques altes de los ríos Carrión y Pisuerga, na fastera sur del Cordal. Comprendía unos 24 conceyos que van amestándose pal sur cola meseta. Pertenez al Reinu d’Asturies dende los oríxenes yá que foi la primer tierra al sur del Cordal Asturianu n’ocupase. Tando al sur de Liébana configuróse con ésta como un solu condáu (provincia) asturianu. La peculiaridá fronteriza y estratéxica de Pernía permitió constituyir los alfoces (territoria) de Peñas Negras y Cervera, con castiellos ‘tenentes’ que governaben les poblaciones (suburbia castellorum). Piedras Negras (Petras Nigras) fundóse como baluarte defensivu del Reinu d’Asturies.
La Carta-puebla de Brañosera, del añu 824, del reináu d’Alfonsu II ye’l fueru municipal más antigu d’Asturies conserváu y ye testimoniu d’esta segunda repoblación foramontana.
La primer constancia documental de Cervera apaez nel monasteriu llebaniegu de Nouroba, del añu 819 durante’l reináu d’Alfonsu II d’Asturies. La comarca cismontana, ya pacificada, foi repoblándose de xente del otru llau de la vertiente asturiana.
Dientro del Condáu de Liébana, La Pernía foi adquiriendo una identidá diferenciada y una progresiva vinculación a la ilesia de Palencia. En 1034 instáurase la diócesis de Palencia. Fernando I confirma en 1059 sos llendes. Pernía yera entós cinco alfoces: Cervera, Peñas Negras, Resoba, Mudá y Tremaya.
En 1125 torna apaecer el nome de Pernía: nel monasteriu de Piasca, Rodrigo González figura como señor d’Asturies (de Santiyana), Liébana y Pernía. En creándose la Merindá Mayor de Castiella, Asturies de Santiyana, y les merindaes menores, una d’elles yera la de Liébana-Pernía, va consolidadose en Castiella una estructura alministrativa estable. ‘Pernía’ desapaeció de la oficialidá alministrativa a mediaos del XIX.

La llingua propia de La Pernía inclúyese dientro del dominiu llingüísticu del asturianu, formando parte de la so variedá dialectal oriental.

La formación d’una comarca cismontana nel condáu asturianu de Liébana requirió una denominación propia. El primer testimoniu escritu d’esti vocablu provién del sieglu XII. Cabe suponer que ‘Pernía’ surde del raigañu llatinu penn- (o pinn-), ‘ala’ o ‘almena’.
Evolucionando nel medievu los vocablos penna, pena, pinna o, más significativamente, penia, que pañaron les acepciones de »peña’ o de ‘fortaleza’. Asina decantámonos por que ‘Pernía’ significara dende un principiu ‘fortaleza’ o ‘comarca fortificada’. Igual que ‘Castillería’, que naquel entós formaba parte de Liébana-Pernía. Esta interpretación adecúase a los comienzos del Reinu d’Asturies, cuando estos montes yeren frontera natural del reinu asturianu. Pa esti fin defensivu construyéronse castros sobre los collaos y aquellos baluartes asturianos sobre los cumales fueron lo que dio nome a ‘La Pernía’.
La llingua propia de La Pernía inclúyese dientro del dominiu llingüísticu del asturianu, formando parte de la so variedá dialectal oriental, caracterizada pol mantenimientu de la efe llatina mediante aspiración de la mesma (f.uente o f.uan, f.umu, f.itu…).
Otru rasgu típicu ye la palatalización (llosa, llende, llares, llazos, llama, llueza, llera…), el mantenimientu del grupu –mb- (lomba, lamber, lambreña…) y otros resultaos asturianos (Olaya, Santiyana, Santuyán, regüeye, regoyu, milayu, tremaya, ruya, payules…).
Abunden los diminutivos en –ín- (colladín, lloventín, correntín, Pachín, culín, escarpín…), los finales masculinos en –u (f.oyu, colláu, ríu, prau, jatu…) las guturalizaciones iniciales (güevu, güecu, güesu, güerta, gomitar…); les preposiciones de llugar del tipu so- (so la peña, so pontón, so los güertos, so la cuesta…); verbos (diz, tien, vien, sal…); y diptongos asturianos (sietecientos, juegar, güétagu, duerna…), contracciones pal, tol, nel…; y otros rasgos más del asturianu. La toponimia autóctona de La Pernía, que tamién sufrió un procesu de castellanización, presenta manifestaciones típiques del asturianu como llingua que ye propia de La Pernía, y de la que la siguiente llista ye sólo una pequena amuesa:
Altu Regüeye, Amayuelas, Argañal, Bardales, Las Collallosas, Pumar, Llagos, Caminu Pindiu, Colladín, Collallosas, El Colláu, La Llosa, Esgobiu, F.oya, F.uan Fría, F.uan Seca, Lladas, Llaguillos, Llama, Llantas, Llazos, Los Llazuelos, Llende, Lleramanzanu, Llongar, La Llueza, Molín, Orzanéu, La Puente Cimera, Santuyán, El Sel, Los Seles, Socolláu, Solamata, Solosgüertos, Sorrobléu, Trespeñas, Valdebedules, Valdiduerna, Valtolaya, Vegallares…