9.5 C
Oviedo
jueves 28, marzo 2024

Los oríxenes del territoriu asturianu

Lo más leído

¡Haz clic para puntuar esta entrada!
(Votos: 0 Promedio: 0)

Nel colláu ovetense hubo un santuariu al dios celta Llug-Candamiu. Llugus yera la ciudá sagrada de Llug na vega del Nora. La conquista romana camuda Llugus en Lucus Asturum.

El santuariu de Llug conviértese nótru al dios Xúpiter. Asturia heredó’l nome del ríu Ástura por arbitrariedá romana: el Conventus Asturicensis. La estatua de Xove recibió’l nomatu despectivu de Xovetu(s) > Xuviéu > Uviéu y significa Xupiterín o Xovetín. Esti templu ha tar nel colláu pero non la civitas que ta na Vega del Nora. Caedes Lata o La Carisa són nomes romanos como Villaperi, Abuli, Pumarín, Villamiana…. La civitas tien llendes nel ríu Nora (honor, tierra). Colubréu, Serpiéu, Ucieda, Somiéu… són diminutivos claros. Uviéu significa una estatua-santuariu de Xúpiter diminuta. Lucus Asturum ye La Vega d’Uviéu.
En cayendo l’imperiu romanu los tresmontanos atopáronse cola independencia. Les invasiones de vándalos hasdingos nel 409 apurren una organización cristiano-arriana y un nuevu arte decorativu. El cristianismu tardíu implanta una organización territorial xerarquizada, articulando’l territoriu alrodiu d’un monasteriu-obispáu arrianu a la manera nórdica o celta. La ilesia cristiana hereda la organización del imperiu. Lucus Asturum yera centru de caminos y centru relixosu. Astúrica Augusta o Clunia sólo fueron poderes ayenos impuestos a esos «montañeses» del norte. Lucus Asturum foi el más importante centru romanizador al norte de los montes y el primer centru cristianizador, el primer obispáu de les Asturies que dará nome al territoriu asturiense que da razón de ser y orixe principal al territoriu de les actuales Asturies.
Lucus Asturum tenía territorios dependientes. Llendaba con Brañes y Muries de Paraxuga. Yera una cívitas: un conceyu rexíu por unes normes onde los habitantes yeren ciudadanos. Lucus Asturum fizo que la ciudá diera nome a tol territoriu dependiente d’ella. El territoriu de Lucus Asturum configura la idea d’una nueva Asturia «asturiense».
Los vándalos hasdingos instálense pel territoriu. Provienen del centru d’Europa yá romanizaos y cristianizaos nel arrianismu. Colos vándalos entama la definitiva cristianización y desromanización del territoriu tresmonanu. Salas, Frexulfe, Fafilán, Sama, Gadina, Gudín, Guimarán, Gauzón, Guarda, Taramundi, Sariegu, Siero, Suarón… y nomes de persona como Gaudiosa, Salamino, Gomesindo, Hermesinda, Leminio, Ausano, Bermutus, Hordonius, Fáfila… són d’orixe vándalu, y palabres como: tapín, llata, gabitu, estaca, amagar…. Los vándalos revalorizaron Lucus Asturum refundándola sobre nuevos pegoyos cristianos: la fundación d’un monasteriu principal onde l’abá exercía les funciones obispales presidiendo toa una rede de monasterios ya ilesies sufraganies.
L’espaciu comprendíu ente los obispaos de Mindoñéu, Lugo, Astorga, Oca y Calagorra nun quedó al marxen, formó una unidá eclesiástica vándalo-arriana nel sieglu V: una diócesis con centru en Lucus Asturum que va conocese a partir d’agora como Asturia, del Eo al Mena. Asturies ye una creación eclesial del sieglu V que comprendía un territoriu que tenía por centru organizativu a Lucus Asturum.

Asturies ye una creación eclesial del sieglu V que comprendía un territoriu que tenía por centru organizativu a Lucus Asturum.

Los oríxenes del territoriu asturiano.

Los cultos a San Tiso, San Iyán, Santa Cristina, Santa Bárbara, San Claudio o San Román fueron introducíos polos vándalos arrianos. Elementos decorativos y piezes del pre-románicu són en realidá de tradición vándala.
Alfonsu II nun construye Santuyanu nin lo fai n’Uviéu, sinón que reconstruye, restaura, decorándolu a la romana con un arcu trunfal por iconostasiu, el trunfu de la nueva Lucus Asturum. So padre Fruela construyera un palaciu pero’l programa alfonsinu ye restaurar Lucus Asturum. Por eso edifica al llau de Santuyanu, a 180 metros, unos palacios, resurdiéndo l’ave fénix del escaezu, una nueva Roma. Nel so capitoliu edifica templos pero’l so palaciu edifícalu en Luco Asturum que va convertise como propiedá real en palaciu de la reina Urraca I y monasteriu de Santa María de la Vega.
Santuyanu yera’l principal templu de Lucus Asturum, dedicáu al emperador o a Marte. Nel colláu, Xúpiter, antes Llug, presidía la civitas. L’esmoronamientu del imperiu enllaza cola cristianización de los vándalos hasdingos nel sieglu V. El colláu de Iove, llamáu Xovetus entama habitase. El vieyu tempu tien nueva advocación: San Iyán, mártir de los vándalos arrianos. El monasteriu de Lucus Asturum esparde’l cristianismu pel so territoriu tresmontanu: el territoriu asturiense. Una nueva destrucción: los normandos. En Lucus Asturum sólo remanecerá’l recuerdu del pasáu y el rellumu de les vieyes ilesies. L’Asturia de Lucus Asturum tantes veces aisllada ta en manes de la Ilesia. L’Asturia tresmontana, separtada siempre de la cismontana, seguirá siendo plural, Asturiis, Les Asturies d’obispos y abás, d’Uviéu, Santiyana y Tresmiera. Y nesti territoriu nel 718 surdirá otra resistencia: el Regnum Asturorum.

¡Haz clic para puntuar esta entrada!
(Votos: 0 Promedio: 0)

Más del autor /a

DEJA UNA RESPUESTA

Por favor ingrese su comentario!
Por favor ingrese su nombre aquí

- Publicidad -

Últimos artículos