Un brunch a la calor del resol d’abril
con deep house de fondu.
El gin fizz ponse ḷḷambión
y nes semeyes con filtru Juno
apaezo con gafes de sol nueves y camisa Polo Ralph Lauren
creando una formosa estampa de glamour y esquiciadura
porque sí, ḥoder, porque merézolo.
Dempués damos un paséu al ḷḷau del ríu
pa baxar tolo que comimos y tolo que bebimos
y abondo distrayíu paro énte un panel
que fala d’esi pueblu nel que tamos,
de la so hestoria, de cómo vivíen d’antiguo
y ḷḷeo, ablocáu, que había unes muyeres ḷḷamaes “mineres de ríu”.
Muyeres que con garabatos, cedazos y cestos
papaes hasta la cintura removíen lo más puerco del Nalón
pa sacar delles piedres de carbón
coles que poder matar la fame.
Fame, fame, fame,
¿A que t´asusta?
¿A que te revuelve’l brunch?
¿A que de sópitu el gin fizz te retuerce´l estómagu
con tan solo escuchar esi nome?;
fame, la fame.
Piedres de la peor calidá,
restos de la ḷḷavadura del mineral,
lo que naide quería,
la basoria de les roques, ceniza namás válida p’avivar les teyeres
y calecer un poco les manes
nes nueches d’iviernu.
Dixebro la vista del panel
y camino d´espaldes al sol
ḷḷamiendo la mío propia traxedia,
posando los pies nel suelu,
imaxinando otres vides,
almirando’l sacrificiu de quien merecieren
que daquién inventara pa eḷḷes una máquina del tiempu
pa que pudieren pasar esta mañana soleyera d’abril
esfrutando d’esi gin fizz afortunáu que me dexó asina,
tan
asoráu,
y col alma tan escura como antes
pasaben les agües nigres
d’esi ríu.
“Fame” pertenece a Fondures, un poemario escrito íntegramente en asturiano con el que David Fueyo realiza un homenaje a quienes pelearon en la mina su sustento, su lucha y su identidad y ahora se encuentran con que de aquello apenas quedan unos cuantos castilletes en pie.