Na villa de Candás, nel conceyu onde s’asitia Llorgozana, pueblu onde ñació Antón de Marirreguera, primer autor lliterariu conocíu d’una obra n’asturianu en 1639, cellebróse nel so honor la II Reguerada Fest, na capital de Carreño.
Una feria d’empreses, lliteratura, música, artes visuales y escéniques y gastronomía en llingua asturiana. Abierta y de baldre pa tolos públicos, nel Muséu Antón, na Biblioteca, na Fábrica Ortiz y nel Teatru Prendes. Foron trés díes d’ochobre nos que los candasinos vieron cómo se tornaben na capital de la cultura asturiana fecha na llingua del so primer escritor.
Una ventena d’entidaes y creadores amosaron la so xera, nes más de 30 actividaes de la feria organizada pola Viceconseyería de Cultura, Política Llingüística y Deportes y el Conceyu de Carreño.
Talleres, recitales de poesía, alcuentros con autores y meses redondes, películes n’asturianu, teatru y cuntacuentos, con ruta lliteraria pela villa, foron un llamáu a siguir per esa llinia que paez consolidada nos años vinientes.
Un afayadizu llugar d’alcuentru ente les empreses que se manden del asturianu y el públicu que tien a esti idioma como identitariu.
La Reguerada de Candás ye una feria d’empreses, lliteratura, música, artes visuales y escéniques y gastronomía en llingua asturiana. (…) Talleres, recitales de poesía, películes n’asturianu… foron un llamáu a siguir per esa llinia que paez consolidada nos años vinientes.
Ún de los actos que rescampló foi la proyeición de “Bernabé”, película collaborativa con un resultáu del más altu nivel de calidá.
“Bernabé” ye’l primer llargumetraxe n’asturianu, cumple 10 años y punxéronlu nel Teatru Prendes, con un alcuentru col direutor Pablo Casanueva que fizo la so estrena con 17 años y 80 collaboradores.
La película guarda’l frescor de la fotografía, la natura, la puesta n’escena, la música celta y un guión orixinal. La película basada nos rellatos recoyíos de la tradición oral sobre la lleenda del bandoleru y dempués fugáu llaniscu rodada en Ribeseya y n’asturianu dafechu.
La trama fala d’una griesca col serviciu militar que fizo que Bernabé s’echara al monte y s’averara al movimientu de los fugaos, surdíu cola cayida del Conseyu Soberanu d’Asturies y Lleón, en 1937, tres la Guerra Civil nel norte. Trescurre na so vida ente 1942 y 1952 na que la figura perconocida nel oriente asturianu desapaez nun final abiertu.
Malpenes queda xente que lu conoció pero entá queda’l so nome como una lleenda de la hestoria asturiana de recién.
Ye d’esperar una continuidá de les películes hestóriques y de ficción basaes n’hestories asturianes y n’asturianu nun futuru.
Mientres, en Xixón facíase un gran homenaxe y esposición a Haruki Murakami nel edificiu de l’antigua Tabacalera. Foi una oportunidá perdida pa poner al mesmu altor a ún de los más importantes cineastes n’asturianu y al escritor xaponés premiáu col Princesa de Asturias de las Letras, colo que xorrecería la visibilidá que carecen los autores del país na so propia tierra.