Pa les antigües civilizaciones el mayor honor yera que los fechos y persones se recordaren col pasu del tiempu. El mayor deshonor yera l’olvidu. Vivimos nuna sociedá cada vez más deshonrosa y olvidadiza que por pereza nun quier remembrar lo importante del pasáu del que venimos y que construyó’l nuestru presente nel que tamos. Confiemos en que dalguna d’estes efemérides del 2015 seyan celebraes o polo menos recordaes pa evitar mancanos col tontu error del escaezu.
L’añu 815 marca’l comienzu del Camín de Santiagu Uviéu-Compostela inauguráu pol rei Alfonsu II d’Asturies que mandó facilitar pasos, iguar caminos y pontes y al empar manda edificar nel sepulcru la primer hermida-mausoléu dedicada al Santu Yagu, que llueu va proclamase como santu protector del Reinu d’Asturies, desplazando a San Miguel guerreru como santu preferíu polos monarques. Nel 915 entama l’obispáu d’Hermenexildu II (7u obispu d’Uviéu depués de la diócesis vándala) que dispón la traída de los cuerpos de Santa Lucrecia y San Euloxu de Córdoba. La ilesia de San Félix de Llugones pasa a depender de la d’Uviéu. Nesti añu govierna Asturies (del Eo al Nervión) el rei Fruela II cola reina Nunilo y el so hermanu Ordoñu II manda nel restu del reinu dende Lleón. 
En 1015 preside la siella obispal d’Uviéu Adaganéu (Adegundu, nome vándalu) que fai obres n’abondos conventos.
En 1115 Rodrigo Muñoz ye Conde d’Asturies d’Uviéu mentantu que Rodrigo González de Lara, hermanu del amante de la reina Urraca, yéralo d’Asturies de Santiyana. Los condes yeren los delegaos provinciales del Rei d’Asturies. Ye un añu caóticu pues apaez la figura de Gonzalo Peláez como potestas o rexente (conde) d’Asturies d’Uviéu que se rebela contra la reina Urraca. El so apellíu indica qu’aspiraba a reinstaurar la corona de Pelayu na so persona recuperando l’antigua soberanía d’Asturies. Disponía ésti d’un secretariu o maiorinu (merinu) de nome Cristóbal Xuánez.
Confiemos en que dalguna d’estes efemérides del 2015 seyan celebraes o polo menos recordaes pa evitar mancanos col tontu error del escaezu.
De 1515 ye la fundación de L’Habana (25 agostu) y de Santiagu de Cuba por Diego Velázquez de Cuéllar.
1715 supón el fin de la Guerra de Sucesión Hespañola col Tratáu d’Utrecht. Del añu 1815 ye la independencia d’Andorra, el Congresu de Viena que traza nueves fronteres y la derrota de Napoleón en Waterloo (18 xunu) con un destierru en Santa Helena. El 26 de febreru de 1815 muerre Agustín de Pedrayes (Llastres, 1744), el matemáticu Pedrayes, famosu por dar solución al problema del cálculu infinitesimal y fixar un nuevu sistema de pesos y midides. Pedrayes propuso dividir l’arcu del meridianu en diez millones de partes pa dar col metru, qu’en griegu significa midida. L’ocho de marzu de 1815 naz n’Uviéu Xuan María Acebal, príncipe de los poetes bables. El cuatro de xunu Fernando VII crea la Cruz de Distinción del Exércitu d’Asturies, condecoración o medalla oficial col escudu d’Asturies cola frase «Asturias nunca vencida» y nel reversu la inscripción «Exército Asturiano 1808» en recuerdu de la llucha asturiana contra la invasión francesa. Les Asturies viven políticamente na reinstauración del absolutismu borbónicu y lliberales como Díaz Porlier son enforcaos (3 d’ochobre 1815).
En 1915 muerre l’empresariu Luis Adaro y Eduardo Martínez Torner fai trabayu de campu per Asturies recoyendo ya investigando’l folclor asturianu. Nesti añu
tamién se crea la Federación de Fútbol d’Asturies.