El 4 de xunetu de 1997 el Conceyu de Bimenes declaró la oficialidá del asturianu nel contestu d’una intensa reivindicación pa que la reforma del Estatutu d’Autonomía d’Asturies, entós en marcha, tuvieren como resultáu la declaración del nuesu idioma como oficial. Otros conceyos gobernaos por distintos partíos sumáronse a esta declaración reproduciéndola nos sos territorios, les movilizaciones na cai fueron les más grandes naquellos años.
El Gobiernu d’España, al traviés de la so delegada n’Asturies d’entós, Mercedes Fernández «Cherines», llevó estes declaraciones d’oficialidá al Tribunal Superior de Xusticia d’Asturies pa illegalizar esta reconocencia de drechos llingüísticos de los ciudadanos.
Agora, cuando van cumplise venti años d’aquella hestoria de resistencia, el Conceyu de Bimenes ta dipuestu al traviés de la so corporación, a volver a facer esa declaración y animar a otros conceyos a volver a sumase, y con ellos, a tola sociedá asturiana.
Esta ye una importante oportunidá que tenemos que sofitar con toles fuercies posibles, col sofitu de toles organizaciones y persones que n’Asturies quieran da-y un futuru dignu al asturianu y a los sos falantes. Ye’l momentu d’axuntar esfuercios y trabayar pa recuperar l’Espíritu de Bimenes y facer un nuevu asaltu na llucha polos nuesos drechos cívicos, na llucha pola normalidá y la convivencia n’igualdá.
Iniciativa pol Asturianu entama a difundir el so Decálogu de Drechos Llingüísticos nuna campaña que va durar hasta’l Día de les Lletres Asturianes, nel mes de mayu. Cada martes a les 20 hores nes redes sociales presenten un nuevu puntu d’esti decálogu.
Iniciativa pol Asturianu entama esta campaña col oxetivu de dar a conocer meyor a los asturianos los Drechos Llingüísticos que los amparen y facer medrar la conciencia alredor de la necesidá de denunciar los casos nos que se vulneren drechos ciudadanos, los Drechos Humanos.
En twitter: @iniciativaxAST • En facebook: facebook.com/iniciativapolasturianu
Alderiques d’Asturies TV ñació de la xuntanza d’esfuercios d’Iniciativa pol Asturianu, Conocer Asturias y Gomeru Producciones, col envís de ser la primer canal de TV n’internet n’usar l’asturianu como idioma vehicular, con una programación independiente, dinámica y empobinada a tolos públicos, buscando la promoción y difusión de la cultura, les tradiciones, la llingua propia y la realidá social de la comunidá asturiana.
Ufierta conteníos estremaos como alderiques d’actualidá, noticies, entrevistes… El programa ta emitiéndose dende va unos meses na canal de TDT y Telecable MuyMuyTv, los sábados a les 19:30 hores.
Pueden vese los programes anteriores ena páxina web www.alderiquesdasturies.com