Ganadores del concursu de microrrellatos n’asturianu pa xente mozo ‘Entaína a escribir’

1er Premiu. La fin de la pasiónDempués de cuarenta años sentía qu’aquel home pol que diere la vida nun-y correspondía.
Pasaba hores mirándose nel espeyu y entrugando qué fadría mal, qué más quería d’ella.
Ye verdá qu’al principiu ella sentíase feliz, ilusionada… Pero’l pasu los años, tantes hores dedicaes a les sos necesidaes, tantu sacrificiu por él, nun teníen yá recompensa dala.
Ella sentía que nun la miraba, que nin sabía de la so esistencia. Nun taba al altor del so compromisu.
Cada día teníalo más claro, tenía de dexar aquella rellación. Pero, ¿qué pensaríen les demás hermanes del conventu?

Inaciu Galán y González (Xixón, 1986) ye periodista y profesor. Nestos momentos prepara la so tesis doctoral sobre la situación y los dicursos alredor del asturianu nel Franquismu. Presidente d’Iniciativa pol Asturianu y director de la revista de lliteratura moza Formientu, tien obra publicada en numberoses revistes y en volúmenes colectivos, algamando premios lliterarios como’l Pepe Campo de monólogu, L’horru de Carbayedo de microrrellatos o’l Premiu Urugallo del Centru Asturianu de Madrid pol so llabor en defensa del asturianu.

2u PremiuYou nun conozo outra qu’aquella que tu yeras. Préstanme las tos zunas: el tener la ventana abierta, la manera na que pones el queisu nel mio sándwich, ou cómo garras la taza’l café con llechi, colas uñas pintadas de roxu, como las que llevan bien guapas agora Vanessa Gutiérrez ya outras mozas que tampouco conocen a outra muyer qu’aquella que tu yeras.
Pero non, ellas nun saben del divorciu. Quiciabes hasta son felices. Dellas tan esperando como se fai nos cuadros de Hopper. Aquella que tu yeras yá nun tien onde tornar, yá nun sabe qué pue esperar.

Raquel F. Menéndez (Vallouta, Salas, 1993) ye graduada en Llingua Española y so Lliteratura pola Universidá d’Uviéu. Hasta la fecha, la so trayeutoria poética ye billingüe: cola so obra en castellán ganó nel añu 2013 el III Concursu Lliterariu de la Universidá asturiana col so llibru Libélula (Ediuno, 2013) y tamién ta recoyida n’antoloxíes –Siete mundos (Impronta, 2015), Poesía, alma del mundo (Círculo Cultural de Valdediós, 2014)- y en revistes (Fábula, El Alambique o Litoral); n’asturianu, los sos poemas tan espublizaos en revistes como Formientu y Lliteratura.

3er Premiu. ConvivenciaYá lo dicía mio güela, muertu’l perru acabóse la rabia, les coses ye meyor iguales a lo bestia. La convivencia ye difícil cuando se convive con persones. Yo toi convencida de que l’aumentu de les adopciones de perros ta conectáu col aumentu de pareyes que se divorcien. Ye un fechu contrastáu, el trunfu de los perros sobre la xente ta basáu nun pilar: los perros nun falen, polo cual nun pues discutir con ellos. Los animalinos conténtense con poca cosa, un cachín de carne, un paseín matutinu o una caricia dacuando. Contentar a un home o a una muyer abúltame que ye bastante más difícil. Nunca se dio’l casu de qu’un perru abandonara a una persona y colos humanos la tendencia ye contraria. Asina que yo téngolo claro, en casu de convivencia forzosa dame perru y non paisanu.

Solinca Turbón Cuesta (La Felguera, Llangréu, 1981) Mención especial n´asturianu nel X Concurso de Microrrelatos Mineros «Manuel Nevado Madrid» con El que mata a los sueños en 2013. Ganadora del IX Certame de Poesía «Nené Losada Rico» col poemariu Lliteratura Interna en 2014 y tercer premiu nel Primer concursu de Microrrellatos improvisaos n’asturianu pa xente mozo «Entaína a escribir» con Convivencia en 2016.