Estos díes atrás l’Athletic de Bilbao dábamos una llección a los asturianos y sobre manera a los equipos de fútbol d’Asturies y del restu del dominiu llingüísticu. Esti club recibía al Sporting de Xixón (o de Gijon, porque asina ye como sigue denomándose pudiendo usar la forma popular y tamién oficial) con una acoyida llingüística a lo grande: cartelu con un Afayáivos na fachada del estadiu y usu del asturianu na megafonía a lo llargo’l partíu.
Munchos asturianos y asturianes comentaben estos díes nes redes sociales como quedaren plasmaos al ver qu’un equipu de fuera usa más l’asturianu que los grandes equipos de fútbol d’Asturies, como un equipu que nada tien que ver con Asturies fai más por normalizar la presencia del idioma que la mayoría de los d’equí.
Ye verdá que n’otres categoríes, equipos como’l Ciares en Xixón o’l Rosal n’Uviéu, ente otros. O n’otros deportes, equipos como’l Siete Pulmones Baloncestu, son exemplu d’usu comprometíu del asturianu y señalen el camín a siguir pa los demás. Sicasí, entá tamos esperando que los grandes equipos asturianos faigan lo que fexo l’Athletic y usen con normalidá l’idioma, porque ye positivo, porque normaliza y porque-y da los equipos más cercanía cola afición ya identidá.
Dende Iniciativa pol Asturianu vamos trabayar pa que se dean esti cambiu y los equipos asuman la so obligación col territoriu al que representen, usando la llingua propia de l’afición na promoción, na toponimia, na megafonía y en tolos ámbitos, con normalidá y metiéndo-y un gol a la marxinación de la llingua asturiana nel ámbitu deportivu. Mientres, gracies Athletic, por danos esta llección.
La principal operadora ferroviaria d’España, RENFE/FEVE, ta instalando nuevos cartelos nes estaciones d’Asturies. Nesti cambéu les llingues utilizaes fueron el castellán y el inglés, escaciendo dafechamente la llingua propia de la nuesa comunidá.
Por ello, Iniciativa pol Asturianu quier amosar el so descontentu con esta situación de marxinación pal col nuesu idioma. Puesto que, la rede de ferrocarriles, non solo nun lo utiliza nes informaciones, sinon qu’incumple la normativa vixente no tocante a la toponimia de les propies estaciones.
Iniciativa pol Asturianu collabora davezu con empreses pa implementar l’usu del idioma na so actividá.
Iniciativa pol Asturianu collabora cola empresa de Corvera «Asturcón Seguridá» pa que los sos veceros puedan cuntar col cartelu d’avisu de vixilancia n’asturianu. Una collaboración que busca trabayar na busca d’espacios de normalidá y visibilización del asturianu en tolos ámbitos y n’especial nel socioeconómicu.
Les persones interesaes en contratar servicios d’Asturcón Seguridá pueden cuntar agora col usu del asturianu como unu de los elementos de valir d’esta empresa asturiana.