Inaciu Galán y Solinca Turbón fueron segundu y tecer puestu colos sos microrrellatos.
La Sala Borrón d’Uviéu volvió a acoyer per segundu añu consecutivu la edición del concursu de microrrellatos improvisaos «Entaina a escribir». La presentación del actu, tuvo al cargu de los directores xenerales de Mocedá, Almudena Cueto, y Planificación y Normalización Llingüística, Fernando Padilla, asina como de los componentes del xuráu, Adolfo Camilo Díaz, Esther Prieto y Lourdes Álvarez.
Camilo Díaz foi l’encargáu de lleer el testu nel que la decena d’autores mozos que se presentaron, menores toos ellos de 35 años, habríen inspirase pa escribir el so microrrellatu en venti minutos: «Ta bien qu’andes tol día dando vueltes pela mio mollera. Pero pelo menos vístite».
Darréu del aconceyamientu del xuráu, resultó ganadora Raquel F. Menéndez, Inaciu Galán foi segundu premiu; y Solinca Turbón, terceru. Reproducimos los testos d’esti concursu que peslló los actos de la Selmana de les Lletres Asturianes.
«Yá lo dicía Joan Didion: «contámonos hestories a nosotros mesmos pa vivir». Díxite que venía dica to casa pa sentir la tuya, pero pasó’l tiempu y namás contáramos delles que formaben parte del nuesu inconsciente colectivu. Ehí, dende la cama, onde malamente se pue faer un rellatu de la vida d’otros, apropiámonos del tiempu y los personaxes. Falemos del casu de Tomasín, ¡que cerca taba de ser la versión asturiana de la traxedia de Charles Manson y les neñes aquelles, y qué mal se contara!; vínosenos a l’alcordanza l’home que taba siempre na plaza del Ayuntamientu de Tinéu, miagando como lo fai un gatu, esperando al dueñu como s’espera nel teatro del absurdu; tamién Paquita, la del Pevidal, que depués de la guerra fixera un altar a un home que malapenes conocía.
Al final, con ella, díxite: ta bien qu’antes tol día dando vueltes pola mio mollera, pero pelo menos vístite. Reconoz qu’escaecisti la nuesa hestoria ente tantes pallabres, ente tantes hestories que namás se cuenten pa vivir».
Raquel F. Menéndez (Vallouta, Salas, 1993) ye graduada en Llingua Española y so Lliteratura pola Universidá d’Uviéu. Nel añu 2013 ganó’l III Concursu Lliterariu de la Universidá asturiana col so llibru Libélula (Ediuno, 2013) y tamién ta recoyida n’antoloxíes como Siete mundos, Poesía, alma del mundo y en revistes (Fábula, El Alambique, Litoral, Lliteratura o Formientu) Ta acabante espublizar el so primer poemariu n’asturianu «El llibru póstumu de Sherezade», que se fixo col premiu de poesía Nené Losada Rico en 2016. Ta al frente de la editorial Libros de la Libélula Nómada.
Yera una obsesión. Espertar y mirate, ehí conmigo na cama. Tocate tol día, sentir la to calor, esfrutar contigo de tantes coses, con tantes persones, colos nuesos xuegos. Llanzate miraes furtives nel trabayu, viaxar contigo y nun mos separtar nin un minutu. Esa ansiedá cuando nun podía tocate y la emoción al sentite reclamame en metá de la nueche. Yera la nuesa conexón. Hasta’l día nel que te metisti conmigo a bañate y matesti, ensin sentíu, ensin piedá. Sabía que nun yera bona idea tener l’iPhone enchufáu nel borde la bañera.
Inaciu Galán y González (Xixón, 1986) ye periodista y profesor. Prepara la so tesis doctoral sobre la situación del asturianu nel Franquismu. Presidente d’Iniciativa pol Asturianu y director de la revista de lliteratura moza Formientu, tien obra publicada en numberoses revistes y en volúmenes colectivos, asina como’ poemariu «Tierra podre» (Camelot, 2016) algamando premios lliterarios como’l Pepe Campo de monólogu, L’horru de Carbayedo de microrrellatos, o’l Fernán Coronas de poesía en 2016. Na primer edición d'»Entáina a escribir» quedó en primer llugar con «La fin de la pasión».
Hai tantes coses que te da l’amor y tantes otres que te quita… Primero vienen les miraes, les cites prestoses, les caricies per encima y per embaxo la ropa, la pasión, eses palabres que tanto respiguen y esos momentos namás pa ti y pa mi. Llueu les coses suelen complicase y lleguen los problemes: les engarradielles, les coses de perres, el comese la tiesta col por qué nun me fales o me fales enfadáu, la to familia colos sos cantares, el a ónde vas o a ónde dexes de dir, lo que dices y lo que calles…
Abúltame que son munches coses, ye una suerte que nunca llegara a conocete.
Solinca Turbón Cuesta (La Felguera, Llangréu, 1981) Mención especial n’asturianu nel X Concursu de Microrrellatos Mineros «Manuel Nevado Madrid» con «El que mata a los sueños» en 2013. Ganadora del IX Certame de Poesía «Nené Losada Rico» col poemariu «Lliteratura Interna» en 2014 y tercer premiu nel Primer concursu de Microrrellatos improvisaos n’asturianu pa xente mozo «Entaína a escribir» con «Convivencia» en 2016, vuelve a repitir el tercer llugar nesta edición.