La falta d’oficialidá sigue provocando casos de represión llingüística n’Asturies

Siguen les presiones pa evitar la matriculación na asignatura de Llingua Asturiana

L’IES Rosario Acuña de Xixón presiona a una familia pa que’l so fíu nun siga en Llingua Asturiana en Bachilleratu.

Un cursu más dende Iniciativa pol Asturianu siguimos recibiendo denuncies de families que dan lluz sobre les práctiques illegales qu’entá esisten en dellos centros educativos d’Asturies y qu’amenorguen la presencia de l’asignatura d’asturianu.
Nesta ocasión, una familia de Xixón ta acabante avisanos de les presiones recibíes dende la xefatura d’estudios del IES Rosario Acuña pa que’l so fíu nun se matriculare na asignatura de Llingua Asturiana, que’l rapaz lleva tol procesu educativu cursando.
La familia recibió una llamada presionando pa que nun se matriculare al menor, al ser el so fíu, según el centru, l’únicu alumnu matriculáu na asignatura en bachilleratu, presionando pa que cambiare la so elección.
Recibida la denuncia n’Iniciativa pol Asturianu asesoremos a la familia sobre la normativa vixente, y tres informar al centru y dar avisu de que s’interpondría una denuncia, el centru a la fin almite la matriculación del alumnu.
Dende Iniciativa pol Asturianu queremos denunciar esti fechu como un verdaderu ataque al drechu de les families y l’alumnáu a poder cursar l’asignatura Llingua Asturiana en tolos niveles educativos. Recordamos a les families que pasen per procesos asemeyaos a esti, que munches vegaes nun denuncien, que ye importante dalos a conocer y que tienen drechu a que los sos fíos estudien asturianu en tolos niveles.

El Rexistru Mercantil nun permite rexistrar los estatutos d’una empresa n’asturianu

La empresa tien al asturianu como llingua oficial de la mesma nos sos estatutos.

Una empresa de recién creación en Xixón ta acabante denunciar que’l Rexistru Mercantil nun-yos permitió presentar los estatutos de la sociedá namás na so redacción orixinal, n’asturianu, obligando a la empresa a presentar una traducción al castellán.
La empresa, Cuatro Gotes Producciones, que nos sos estatutos recueye que l’asturianu ye la llingua oficial de la mesma, denuncia esta situación que torga la presencia del asturianu nel ámbitu socioeconómicu y que ye según los responsables de la entidá un importante pasu atrás, pues en 2005 una empresa pudo rexistrar los sos estatutos namás n’asturianu.
Pese a que la notaría onde se roblaron los estatutos nun tenía nengún problema en faelo n’asturianu, informando al Rexistru Mercantil, según espliquen dende la empresa, esta institución obligó a presentar la documentación cola so versión en castellán, lo que supón una clara restricción de drechos llingüísticos pa unos ciudadanos que quieren faer la so actividá profesional usando la so llingua propia y oficial de la empresa. Dase la peculiaridá de que la empresa podría redactar los sos estatutos en catalán, euskera o gallegu ensin nengún problema, pero nun pudo entregalos na llingua propia del territoriu onde se crea.
Pa Iniciativa pol Asturianu tamos énte un nuevu casu de represión llingüística que nun podemos más que denunciar. Nun sector clave pa la normalización del idioma, como ye’l campu empresarial, les iniciatives que busquen promover l’usu del asturianu nun atopen más que problemes, mesmo cuando se quier etiquetar un productu n’asturianu (como yá se vio nel pasáu con delles empreses a les que’l propiu gobiernu d’Asturies-yos punxo problemes) o cuando se faen xestiones cola alministración usando l’asturianu (como-y ocurrió a la cooperativa El Nocéu cola Seguridá Social)
La falta d’oficialidá xenera numberosos problemes que-yos impiden usar l’asturianu con normalidá en tolos ámbitos a les empreses qu’usen l’asturianu. Por ello ye un bon momentu pa recordar que pese a qu’estes discriminaciones podríen evitase inclusive ensin oficialidá y acordies cola llexislación vixente, la única forma de da-y normalidá al usu del asturianu en tolos ámbitos ye faciéndolu oficial.