En segundu llugar queda ‘La manifestación pola oficialidá del 21 d’abril, convocada pola XDLA, algama una gran participación ciudadana’ y en terceru ‘Les encuestes pola oficialidá siguen amosando datos positivos. La encargada pol Conseyu de la Mocedá del Principáu d’Asturies amuesa que’l 86,1% de los menores de 29 años apoyen la oficialidá’.
‘Dende Iniciativa pol Asturianu celebramos la participación de los y les internautes nesta encuesta. Cada añu hai más noticies positives alrrodiu l’asturianu y más participantes nesti sondéu’.
Xixón, 14/01/2019
Na mañana de güei, Iniciativa pol Asturianu fixo públicu’l resultáu de la votación popular pa buscar la meyor noticia pal asturianu en 2018. Esti ye’l quintu añu que la organización pon en marcha esta iniciativa pa buscar la meyor noticia de los años anteriores mediante una consulta popular. D’esta manera, los y les internautes escoyeron la noticia de que ‘Santiago García Granda convirtióse nel primer Rector de la Universidá d’Uviéu n’echar una conferencia n’asturianu’ como la meyor d’esti 2018.
La noticia ganadora ye relativa a la conferencia qu’impartió Santiago García Granda, Rector de la Universidá d’Uviéu, baxo’l títulu «Notes sobre la investigación na Universidá d’Uviéu» y convirtióse nun fechu históricu ya que foi la primera vegada en 400 años d’historia qu’un rector echó una conferencia usando la llingua asturiana.
En segundu llugar, y con poca diferencia de votos, queda ‘La Manifestación pola Oficialidá del 21 d’abril, convocada pola XDLA, algama una gran participación ciudadana’ y en terceru ‘Les encuestes pola oficialidá siguen amosando datos positivos. La encargada pol Conseyu de la Mocedá del Principáu d’Asturies amuesa que’l 86,1% de los menores de 29 años apoyen la oficialidá’.
Al términu de la presentación d’estos resultaos, Inaciu Galán, presidente d’Iniciativa pol Asturianu dixo que «dende Iniciativa pol Asturianu celebramos la participación de los y les internautes nesta encuesta. Cuando termina l’añu y facemos la escoyeta de noticies pa esta encuesta, dámonos cuenta de que cada añu que pasa hai más noticies positives alrrodiu l’asturianu y tamién más participantes, más de 300 persones nel sondéu, lo qu’amuesa que esti idioma interesa a la xente».
2- La manifestación pola oficialidá del 21 d’abril, convocada pola XDLA, algama una gran participación ciudadana.
3- Les encuestes pola oficialidá siguen amosando datos positivos. La encargada pol Conseyu de la Mocedá del Principáu d’Asturies amuesa que’l 86,1% de los menores de 29 años apoyen la oficialidá.
4- #YoFaloAsturianu. La campaña de respuesta a Pablo Casado negando la vitalidá del asturianu llegó a más de 5 millones d’usuarios, convirtiéndose na primer tendencia del Estáu.
5- La Conseyería d’Educación y Cultura tien yá preparáu’l documentu que regula l’acreitación de conocencia d’asturianu adaptada al Marcu Común Européu. En primavera podríen convocase les primeres pruebes.
6- La FSA-PSOE celebró per primer vegada na hestoria un actu nel que reivindicaba públicamente la oficialidá del asturianu. L’actu celebróse na Selmana Negra de Xixón, con decenes de personalidaes de la sociedá asturiana.
7- El 89,1 por cientu de les families d’alumnos del plan pilotu pa facer l’asturianu vehicular ta satisfechu col mesmu.
8- Los conceyos qu’aprobaron mociones a favor de la oficialidá representaron a cuasi’l 70% de la población d’Asturies.
9- Respuesta popular a los pateos al avisu n’asturianu na Ópera d’Uviéu. El públicu respuende a los abucheos d’una parte del públicu, hasta facese mayoritaria la postura favoratible.
10- El Consejo de la Juventud de España sofita la oficialidá y la normalización del idioma.