Ramón Garay ye’l compositor de música más importante del Clasicismu asturianu. Podemos calificalu como’l Mozart asturianu debío a una bayurosa y escelente calidá artística y pola so precocidá nel oficiu de músicu.
Ramón Fernando de Garay Alvarez nació en Sabugo (Avilés) un 27 de xineru de 1761 y bautizóse na vieya ilesia de Santu Tomás de Cantorberi. Dende nenu amosó cualidaes pa la música deprendiendo de so padre que yera músicu y organista de profesión del que recibió les primeres clases de solféu y órganu. Foi nenu de coru nel conventu de La Mercé onde recibía clases de música. A los 18 años ingresa como salmista na Catedral d’Uviéu cobrando cuatro reales. En 1782 consta na catedral que recibió dos meses de llicencia por enfermedá. En 1783 foi alumnu n’Uviéu del organista Juan Andrés de Lombida, instrumentu que Garay yá dominaba, pa poder tocar el segundu órganu catedraliciu d’Uviéu. Tamién foi discípulu del Maestru de Capiella ovetinu Joaquín Lázaro col que afondó n’estudios d’harmonía y composición. En Madrid amplía estudios col organista José Lidón, maestru na Capiella Real y al so profesor n’Uviéu, Juan Andrés de Lombida, nómenlu llueu organista del conventu de la Encarnación colo que nun dexó de perder contactu con él en Madrid. Nesta ciudá Ramón Garay asistía a les velades musicales del Teatru del Príncipe y les organizaes pola condesa de Benavente nel palaciu d’El Caprichu onde José Lidón exercía de director d’orquesta. Ramón Garay algama en Madrid el puestu de maestru de música de los neños seminaristes de San Xeromu. En 1789 gana por oposición el cargu de Maestru de Capiella de la Catedral de Xaén, gracies a los informes escritos por José Lidón. Esi añu viaxa a Asturies pa visitar a so padre que per entós yera organista de la Basílica de Cuadonga. En 1792 nómenlu rector del Colexu de San Eufrasiu de Xaén cargu que compatibiliza col de Maestru de Capiella de la catedral, dando clases y componiendo música al empar. En 1814 torna p’Asturies, depués de la Guerra Peninsular, pa reponese d’una enfermedá y en 1815 cuando yá esfrutaba n’Asturies d’un gran prestixu convídenlu de Madrid pa que fuera a dirixir la orquesta de la Capiella Real por expresu deséu del nuevu rei d’Hespaña Fernandu 7u, agradecíu ésti pola dedicatoria del Oratoriu al Santísimu. Tanta yera la so fama. Va morrer en Xaén el 8 de xineru de 1823, enantes de los 63 años, con una merecida fama.
La importancia de Ramón Garay pa la música asturiana ye inmensa yá qu’él representa l’arte musical del Clasicismu asturianu, con clares influencies del Clasicismu vienés.
De la so abundante obra musical llegáronnos más de 300 composiciones anque poques se conservaron de la so obra pa órganu. De la so obra profana destaquen les 10 sinfoníes pa orquesta, compuestes ente 1790 y 1817, y una ópera titulada Compendiu sucintu de la revolución hespañola, editada en 1815. Esta ópera ye una alegoría política de la Guerra Peninsular napoleónica onde se retrata a un país llenu de vicios y condenáu pola divinidá a la invasión militar foriata d’un rei francés hasta que nun s’arrepienta y recupere al rei lexítimu, Fernandu 7u. La so obra de temática relixosa ye l’abundante producción que como Maestru de Capiella taba obligáu a componer pa la catedral como Mises, Salmos, Motetes, Laudes, Responsorios, Viéspores y tamién el solmemne Oratoriu al Santísimu (ópera relixosa) que se caltienen nos arquivos d’Uviéu, Xaén y L’Escorial.
La importancia de Ramón Garay pa la música asturiana ye inmensa yá qu’él representa l’arte musical del Clasicismu asturianu, con clares influencies del Clasicismu vienés siendo ún de los primeros compositores en reinterpretar darréu esti nuevu estilu y qu’inclusó llegó aplicar al xéneru vocal operísticu nun exerciciu avanzáu de modernidá musical que ye xenial y grandiosu. Ramón Garay abandona pronto los artificios del contrapuntu barrocu p’allumar los nuevos tiempos del “xéneru llibre”, la invención llibre de la melodía según les idees de llibertá de la Ilustración. Garay ye por ello ún de los primeros compositores europeos, depués de Haydn, en componer sinfoníes de cuatro movimientos nel nuevu estilu siendo ún de los precursores y padres del sinfonismu.
Nesti añu 2011 celebramos el 250 aniversariu del nacimientu de Ramón Garay. Por ello la discográfica Verso prestosamente editó per primer vez en discu les 10 Sinfoníes del gran compositor asturianu Ramón Garay, el más importante músicu asturianu del sieglu XVIII, pa preste y almiración del mundu enteru.