Un día hestóricu y un tiempu nuevu pal asturianu

Imprimir E-mail
(1 Voto)
Escrito por Inaciu Galán, presidente d'Iniciativa pol Asturianu   
Martes, 24 de Octubre de 2017 12:29
Un día hestóricu y un tiempu nuevu pal asturianu 5.0 out of 5 based on 1 votes.
El vienres 28 de setiembre publicaba un artículu nel qu'animaba a los delegaos y delegaes del congresu de la FSA-PSOE a votar pola asunción de la oficialidá del asturianu per parte del so partíu.
iniciativa-asturianu-banda-logo





iniciativa-el-comercioGüei, unes selmanes dempués, quiero felicitar a la militancia socialista pol pasu hestóricu que dieron l'1 d'ochobre aprobando con un 82% de votos favoratibles la resolución de la comisión d'oficialidá. La propuesta que presentare Socialistes pola oficialidá con gran ésitu nes agrupaciones, foi quien a axuntar un gran consensu, como'l qu'esiste na propia sociedá. Porque los asturianos y les asturianes queremos al nuesu idioma, queremos da-y futuru, queremos que los nuesos fíos sigan falando la nuesa llingua y proyectala hacia'l futuru, y la postura que tenía la FSA-PSOE, y que paez que sigue calteniendo'l presidente Javier Fernández, nun yera razonable nin democrática, porque dexaba a una parte de la sociedá desamparada pola llegalidá, y a la nuesa llingua y cultura ensin la protección necesaria pa siguir viva.
Esi domingu y aquella votación cambió pa siempres el futuru del idioma, porque'l partíu principal d'Asturies sumóse con ella a un consensu que munchos llevábemos construyendo décades, y qu'agora ye mui mayoritariu.
Vivimos un tiempu nuevu pal asturianu, un tiempu que va venir marcáu pol consensu y yá non pol conflictu, un tiempu nel que paez que vamos tener a la FSA-PSOE al llau na construcción d'un futuru pal idioma, y non en frente como hasta agora. Esta ye una gran noticia, un cambiu hestóricu dempués de más de cuarenta años de reivindicación.
Agora queda un gran trabayu per delantre. Los partíos que yá defenden la oficialidá: FSA-PSOE, Podemos, Izquierda Xunida y Foro, tienen que poner en marcha yá les conversaciones necesaries pa una reforma del Estatutu d'Autonomía d'Asturies qu'incluya la oficialidá del asturianu y el gallego-asturianu.
Tienen y tenemos que consiguir que les demás fuercies polítiques, PP y Ciudadanos, tamién se sumen a esti alderique y al trabayu, porque yá nun dicen tar en contra de la oficialidá, agora dicen "que nun ye'l momentu" o que "nun ye una prioridá", pero tenemos de convencelos de qué sí, de qu'esti tien que ser un gran consensu de toos y toes, porque l'idioma d'Asturies nun pertenez a nenguna ideoloxía, a nengún partíu, ye un patrimoniu colectivu y responsabilidá de toos ye conservalu y proyectalu con puxu hacia'l futuru. Y tenemos de facelo yá, porque de desapaición del idioma acelérase si nun se ponen midíes.
Nun puedo más que felicitar a Socialistes pola oficialidá, a tola FSA-PSOE y al so nuevu secretariu xeneral, Adrián Barbón, por esti pasu hestóricu. Recibímosvos colos brazos abiertos nesti trabayu pol idioma, porque nun ye'l momentu de reproches sobre'l pasáu, sinón de mirar al futuru en positivo. Somos munchos los que mos emocionamos con esta decisión y esperamos muncho del vuesu llabor pol idioma xunto al restu de los partíos.
 
scroll back to top
 

Directorio de empresas

silvota_trabajador

Directorio de  Guía de Asturias

Números publicados

portadas

Concejos

mapa_asturias_p