Escomenzamos una nueva etapa nes páxines de la magnífica revista Fusión Asturias a través d’esta renovada sección cultural que quier recordar nesti añu 2015 los 150 años de publicación de la revista Almanaque de las dos Asturias impulsada por esi gran asturianu de Santiyana que foi Don Gumersindo Laverde.
Esta revista editóse en 1865 nun volume recoyendo munches collaboraciones anteriores de personalidaes de les dos Asturies como Llano Ponte, Pereda, Sampil, Amandi, Suárez Bravo, Caunedo… esto ye, de les provincies d’Uviéu y de Santander, con un fin principal: llograr la (re)xuntanza política de los dos territorios asturianos, de les dos «provincies asturianes» d’Uviéu y Santander. Previa a esta xuntanza político-alministrativa yera necesaria una amestadura cultural de la que la revista pretendía ser exemplu a siguir. Xuntar lo que notru tiempu se dixebró, recomponer lo qu’enantes se rompió, refacer hoi lo qu’ayeri se desfizo, reaxuntase pa volver a ser fuertes, éstos paecíen ser los lemes del reintegracionismu asturianista de Laverde y los laverdianos a mediaos del sieglu XIX cuando entamaba a surdir la idea d’agrupar les provincies hespañoles en rexones más amplies.
Que l’Asturies d’Uviéu quedara oficialmente dientro d’un «reinu de Lleón» y que l’Asturies de Santiyana y Tresmiera quedara dientro d’una rexón o reinu de «Castiella» nun yera almisible pa los reintegracionistes pues siguir calteniendo esa división política de les dos Asturies yera del too una aberración. Non sólo por motivos culturales o antropolóxicos sinón pola propia Historia al ser Asturies un reinu orixinariu y soberanu nestes dos provincies munchu tiempu antes de la propia esistencia de los reinos de Lleón o Castiella. A eses razones los laverdianos añadieron una tercera: l’interés económicu de les dos provincies de xuntase pa responder meyor a les crecientes necesidaes de la recién industrialización y del progresu mercantil.
L’Almanaque de las dos Asturias foi una publicación destinada a fomentar el sentimientu patrióticu y la identidá común entre les provincies d’Uviéu y Santander y tuvo un gran valor nel so tiempu.
La xuntanza de Les dos Asturies nuna sola Rexón non sólo respondía a razones histórico-culturales sinón a que la xuntanza fairía unes Asturies inda más fuertes, con mayor pesu políticu y económicu frente a otres, como les Bascongaes que gozaben d’unos privilexos fiscales y que competíen con ventaya frente a Les Asturies. La supresión de los fueros basconavarros entamó ser daquella una demanda insistente en Les Asturies al empar de demandar una solución definitiva al eternu problema de la incomunicación terrestre dientro d’elles y con otros mercaos. La xuntanza fairía la fuerza a tolos niveles.
L’Almanaque de 1865 empezaba col Manifiestu de Les dos Asturies, escritu por Laverde y firmáu por tolos socios d’una y d’otra provincia. Ensayos sobre cultura asturiana, Historia, mitoloxía, etnografía, folclor o Economía enllenaben les páxines ensin escaecer la lliteratura costumista nin la poesía patriótica. Especial procuru gastó Laverde en fomentar el Bable Oriental santanterín. En resume, el fin de los laverdianos yera nel fondu recuperar l’arguyu de ser asturianos, de pertenecer al vieyu reinu de Pelayo, de recuperar les esencies de la cultura popular, la Historia y el ser milenariu de Les Asturies, recuperar en definitiva la conciencia de l’asturianidá compartida.
L’Almanaque de las dos Asturias foi una publicación destinada a fomentar el sentimientu patrióticu y la identidá común entre les provincies d’Uviéu y Santander y tuvo un gran valor nel so tiempu pola trascendencia de los temes que tocó y por contribuir a concienciar a la sociedá de dambes provincies sobre la so propia identidá cultural y política.